Likisapost.com-Liquiçá 01/08/2023, Servisu Nasionál Ambulánsia Médika.IP, Munisípíu Liquiçá, sei Menus Ambulánsia Hodi Tula Pasiente Sira Iha Area Rural.
Tuir Xefe Departamentu Servisu Nasionál Ambulánsia Médica Municipio Liquiçá, Luis M. Albino hateten, ambulansia ne’ebé maka foti pasiente sira iha suku no aldeia paradu tanba hetan insidente iha fulan tolu ba kotuk.
“Kona-ba ambulánsia menus atu hatete de’it katak, foin dadauk fulan tolu ba kotuk ita hetan insidente ida, ambulánsia insidente iha Tasi-Tolu, entaun ambulánsia ne’ebé maka foti moras iha suku aldeia to postu mai to sentru saúde, pois halo referál ba nasionál entaun ita paradu tia husi suku no aldeia”, tenik Luis iha edifisiu Servisu Nasionál Médica Munisípiu Liquiçá, 01/08/2023.
Aliende ne’e nia akresenta tan katak, dadaun ne’e utiliza de’it ambulánsia uzadu, nune’e la-bele foti pasiente sira iha aldeia no suku sira, tanba kondisaun la permite.
“Iha ne’e ambulánsia ida ne’ebé maka uzadu ona, tinan sanulu resin lima ona, no mós ida seluk todan hotu ona, atu garantia maibé natoon de’it, entaun nia bele halai de’it husi Liquiçá ba iha Dili, halo transparánsia moras husi Liquiçá ba Dili de’it atu foti to’o foho ne’e labele tanba kondisaun maka la permite”, nia informa.
Ligadu ba problema menus ambulansia iha sentru saúde munisipíu Liquiçá tuir Direktór Servisu Munisipál Saúde Liquiçá, Oris da Costa Alberto haktuir, daudaun nee iha ministériu saúide fahe ona servisu, kona-ba responsabel ambulánsia SNAEM.IP sira nia diresaun mak instala no kompeténsia ne’e husi SNAEM,ip mak sei responsabilidade.
“Ita agora iha Ministériu Saúde ita fahe ona servisu responsavél, iha ambulánsia ne’e ita ba iha SNAEM.ip sira nia diresaun, so uluk iha 2022 ita sei serbisu hamutuk ho munisipíu ninia responsabilidade, maibé ba ona IP, entaun instituisaun públiku SNAEM.IP, iha ne’e sira instala ona departamentu ida ne’e husi diresaun nasionál mai instala iha sentru de saúde internamentu” tenik Oris.
Aliende ne’e Direktór Saúde Munisipál ne’e aprofunda, iha sentru saúde munisípiu Liquiçá iha kareta multifunsaun ida atu responsabel ba tula pasiénte balun ne’ebé maka iha emerjensia ninian.
“Ita iha kareta multifunsaun entaun ida ne’e ita garantia bele tula pasiente, entaun iha ne’ebá servisu iha sentru saúde ita nia motorista ida ho responsabel iha ne’ebá, i nia tula iha oras serbisu ninian kada loron oras 8, entaun nia tula pasiénte balun ne’ebé maka iha emerjensia” tenik Diretór.
Enkuantu ligadu ba problema menus Ambulánsia hodi transporta pasiénte sira ba sentru saúde maka dadaun ne’e, Servisu Nasionál Ambulánsia no Emerjénsia Médika, SNAEM.IP koopera ona ho sentru saúde munisípiu Liquiçá no autoridade seguransa sira hodi atende emerjensia ba iha komunidade sira.
Reportajen : Ekipa GFD
