Likisapost.com Palásiu Presidensiál Nicolau Lobato, 03 Fevereiru 2023 Xefe Estadu Sorumutu ho Komandante Indo-Pasífiku Estadus Unidus Amérika Hodi Deskuti Relasaun Iha Setór Seguransa.
Komandante Indo-Pasífiku Estadus Unidus Amérika Almirante John C. Aquilino, hala’o sorumutu ho Prezidente Repúblika hodi ko’alia kona-ba Setór Seguransa.
“Estadus Unidus Amérika mantein kooperasaun seguransa iha tempu naruk ho Timor-Leste. Ita hala’o ezersísiu militár konjuntu sira, promove ba oin dezenvolvimentu no formasaun profisionál sira no reforsa asisténsia humanitária, Ha’u hein ba oin hakle’an liután ita-nia kooperasaun, bazeia ba ita-nia valór demokrátiku no interese komún sira iha rejiaun Indo-Pásifiku ida ne’ebé nakloke no livre,” Tenik Almirante Jhon Aquilino.
Prezensa Almirante Jhon Aquilino iha Timor-Leste, atu partisipa aniversáriu F-FDTL, entrega unidade kuidadu intensive movél iha Hospitál Nasionál Guido Valadares ne’ebé hetan finansiamentu husi Ajénsia USAID ho orsamentu dólar amerikanu millaun 2.3, hodi kria ekipamentu moderna, hodi garante kualidade prestasaun servisu saúde.
Partisipa mós iha assinatura Programa Parseria Estaduál, atu haforsa dezenvolvimentu profisionál, formasaun, no interkámbiu sira entre F-FDTL no Guarda Nasionál Rhode Island no estabelese kooperasaun entre Timor-Leste no Rhode Island iha setór governasaun, seguransa, ekonomia no sosiál.
Jornalista : Francisco Xavier
Editór : Ekipa Likisapost.com
