Likisapost.com loron 03/11/2022 Limanaro, Komunidade uma kain hitu iha bairo Bia Hedan hahú hela iha tinan 1993, iha suku Rairobo aldeia Limanaro too agora seidauk asesu ba lina eletrisidade.
Tuir Xefe suku Rairobo Pedro Leitão Afirma, liña eletrisidade iha suku Rairobo atinje ona 95% pusentu, iha hau nia populasaun uma-kain hitu mak seidauk hetan prioridade husi liña eletrisidade.
Populasaun uma kain hitu ne’e sedauk asesu ba liña eletrisidade sei fó impaktu makas ba labarik sira iha tempu kalan la bele atu estuda ho diak tanba nee labarik sira mak foin sae ba futuru ba nasaun ida ne’e nian.
“Ami rekomenda nafatin ba parte Governu, no halo nafatin proposta atu bele mós haree hotu populasaun uma kain hitu ne’e, bele asesu hotu ba liña eletrisidade” dehan Xefe suku Rairobo Pedro Leitao, iha sede suku Rairobo loron Tersa, 03 de Novembro (2022). Nia esplika, antes ne’e iha tinan 2011, komapania ho naran Havana mak menan ona tenderizasaun husi parte Governu ba instalasaun lina eletrisidade iha suku Rairobo, hahu husu baliza ho suku Aidabelete, ho kuaze kilometru 15, to’o Deit aldeia Faturase no Limanaro, maibé, instalasaun lina eletrisidade bainhira monta besi ba komunidade nia uma hodi dada eletrisidade laiha mekanizmu ho diak hodi uza lem no taka fali kuak husi kalen nian, atu nune’e udan been la bele tama.
Tuir Aldeia Limanaro Aleixo Mauloe Tavares, hatete, sente preokupa tebes hau nia populasaun uma kain hitu ne’ebé sedauk asesu ba lina eletrisidade, tanba kompania Havana dada la too ba uma-kain hitu nee, signifika aldeia ida ne’e populasaun balun seidauk asesu hotu.
Uma kain hitu ne’ebé seidauk asesu ba lina eletrisidade, maizumenus ho kilometeru ida ho balun, ne’ebé antes ami ho kompania sira sukat ona maibé la konsegue realiza, too ohin loron populasaun uma-kain hitu ne’e sei tur hela nakukun laran.
“Maske nune’e komunidade Sira sei utiliza hela solar solar sel agradese sei fasilita netik iha tempu kalan, hodi labarik sira bele estuda ” dehan xefe Aldeia.
Entretantu reprezentante habitante husi aldeia Limanaro bairo Bia Hedan Diamentino Valenti Xavier hatete, sente triste tebes durante ema seluk mak goja estadu nia dezenvolvimentu Ida ne’e, ami bairo Biahedan aldeia Limanaro sedauk asesu tebes ba lina eletrisidade.
“Ami iha ne’e la bele asesu ba Liña eletrisidade , ami hanoin antes nee Governu ne’ebé fó tenderuzasaun ba kompania Havana atu dada liña eletrisidade to’o mai ami bairo Bia Hedan ne’e maibé la to’o ne’e tanba saida” dehan habitante.
Nia rekomenda, husu ba ministeriu relevante atu tau netik preokupasaun mai ami bairo ida ne’e nune’e ami mos bele goja hotu dezenvolvimentu ida husu mós ba kompania refere atu bele haree no tau preokupa mai ami bairo ida ne’e, importante ma kami bele asesu hotu ba naroman.
Jornalista: Ako
Editor : Berkoli Maubrani
