Ha’u hahú hakerek istória ne’e hafoin ha’u haree iha sidade foinsa’e sira preokupa hili sira nia prezenti murak ba ema hirak ne’ebé sira hadomi, dalaruma ba sira nia doben, kolega no sira sei kontenti liu oferese ba sira nia parente. Imi hatene ka lae? Ha’u hanoin ita hotu hatene kona-ba loron domin! Iha istória ne’ebé mai ho versaun no autór ida de’it relasiona ho loron espesiál refere ne’ebé kuñesidu ho língua Ingleza katak “Valentine day” refleta ba Santo ida nia luta ba domin.
St. Valentinu ema relijiozu ida ne’ebé luta hodi depende foinsa’e sira nia relasaun domin iha tempu ne’ebá, tanba de’it desizaun autoritariu husi liurai Klaudius II ne’ebé hatete foinsa’e mane hirak ne’ebé seidauk iha parseiru obrigatoriamente tenke tama militár entaun St. Valentinu kontra desizaun refere hodi depende foinsa’e sira, maibé esforsu husi na’in ba naran valentine ne’e ikus mai hetan pena de morte. Molok St. Valentinu hetan pena refere ema kastigu uluk iha komarka maibe hela iha komarka St. Valentinu nafatin halo nia misaun husi nia asaun di’ak sira hodi ajuda ema seluk.
Momentu ne’ebá St. Valentinu esforsu hodi kura xefi prizaun nia oan feto ne’ebé iha moras matan, hafoin xefi prizaun ne’e nia oan feto rekopera xefi prizaun ne’e koko atu selu St.Valentinu nia di’ak liu husi oferese surat tahan pedasuk ida ba St. Valentinu nune’e St. Valentinu hakerek iha surat refere katak nia iha domin ba labarik feto ne’ebé nia kura. Husi nia surat ikus molok nia hetan pena do morte nia hakerek ba labarik feto ne’e ho títulu “From Your Valentine”ka iha dalen tetun husi o nia valentinu, istória romantika ne’e mak orijen husi loron domin ne’ebé aban ita selebra.
Esensia husi istória St. valentinu nian ne’ebé ha’u relata brevemente iha leten, ha’u iha ona prezenti rasik ba o ha’u nia belun, horseik bainhira ha’u liu husi loja ha’u hateke ba sorin karuk sira hili sokolate, ha’u hateke ba sorin loos sira hili ai-funan, ida fali iha ha’u nia oin nia hili faru ka’os ida. Ha’u hamrik ho we botil ida iha ha’u liman no frustradu loos lahatene ha’u ho prezenti saida ba ha’u nia belun maibé ha’u haksolok los foinsa’e sira interpreta ho simbolu mesak furak ba sira nia doben, kolega ka ba sira nia parenti iha loron domin ne’e.
Ha’u hanoin hetan ona saida mak ha’u nia belun nia kuriozidade, nia hakarak deskobre aspetu siénsia kuñesimentu balun liu husi lee, hakerek, estuda no produs obra eskrita rasik, hafoin hanoin hetan ida ne’e ha’u iha ona prezenti murak ida mak ha’u atu oferese ba o belun nun’e ha’u husik hela loja refere no prefiru kedas loja ne’ebé ha’u tenke tenke vizita. Ha’u laiha prezenti luxu ida hanesan ema hirak iha liur ne’ebá maibé ha’u hatene katak prezenti ne’ebé ha’u sei oferese ba ó iha valór boot loos ba o belun di’ak, ha’u sei oferese ba o ho silensiu karik ita iha tempu hasoru malu. Ha’u iha livriñu ida ba o no livriñu ida husi ha’u ba o, koko deskobre siénsia kuñesimentu balun ne’ebé naksubar iha laran, lee dala ida sei hariku o nia hanoin atu produs fraze wa’in ne’ebé hafutar iha o nia obra eskrita sira, ida ne’e mak ha’u nia interpretasaun iha loron valentine ba ha’u nia belun no ha’u sei oferese ba imi asaun importante balun ho imi nia doben iha paragrafu tuir mai.
Hako’ak imi nia parenti no hakmatek iha kuartu hodi lee imi nia livru iha loron domin, la presiza ba tasi ibun maibe estuda de’it iha uma iha loron domin, koko hadomi imi nia livru iha loron domin. Karik ba tasi ibun ho imi nia doben lori ho imi nia livru, lee no anota siénsia kuñesimentu ruma ne’ebé furak iha loron domin, ha’u fiar imi nain rua nia loron domin sei úniku no furak liu sira horseik hili sokolate, aifuan, no faru ka’us ne’e ha’u belun sira. Karik imi hakarak oferese prezenti ruma ba imi nia doben iha loron domin liu husi ai-funan falun mós livriñu ida no haleu ho ai-funan, imirua nia prezenti iha loron domin úniku los liu sira horseik iha loja ne’e belun.
Ha’u hatene dalaruma imi la maduru hili fatin atu selebra imi nia loron domin nune’e ha’u hakarak rekomenda fatin furak liu atu selebra imi nia loron domin ho imi nia doben, koko vizita biblioteka iha loron domin imi sei hariku imi nia kuñesimentu ho livru oi-oin. Selebra imi nia domin iha biblioteka dalaruma Bibliotekáriu sira sei esplika ba imi siénsia hirak ne’ebé imi hetan iha kada livru, Igreja mós sai fatin dignu ida ne’ebé bele oferese prezenti ba imi nia doben liu husi husu tulun ba Maromak atu hakmaan imi nia relasaun domin no imi nia planu sira ne’ebé imi planeia ba imi nia futuru, aban loron sinjas loron importante ida ba sarani hotu oinsá bele hanoin hikas moris ne’e sei fila fali ba nia orijen nune’e lori imi nia doben ba Igreja iha Kuarta Feira Sinjas hafutar imi nia domin ho ahu kudesan no Maromak nia liafuan ha’u fiar buat hotu sei sai furak iha imi nia relasaun domin ne’ebé imi hala’o. Asaun ne’e simples maibé úniku ba imi kuandu imi tau iha prátika, imi presiza kuidadu-an iha loron domin hadok-an husi asaun hirak ne’ebé la dignu ba imi nia futuru. Iha ha’u nia artigu antes ne’e ko’alia mós kona-ba oinsá ita nia prátika no asaun simples sira iha relasaun domin.
Prátika asaun hirak ne’ebé fó valór ba ita nia-an, lori ita nia doben ba fatin ne’ebé seguru nune’e nia bele iha komfortu iha ita nia relasaun, oferese ba nia simbolu furak no úniku nune’e sai sasukat ba imi nia domin loloos. Haksolok ba ho imi nia loron domin no uza imi nia tempu ho loloos nune’e sai maduru liu tan iha loron domin ne’e, hadomi malu koko fó komfortu ba malu no harmoniza imi nia relasaun nune’e la bele fó prejuizu ba imi nia relasaun. Ha’u laiha referensia barak ba loron domin ne’ebé atu hato’o ba imi maibé ha’u sauda loron domin ba ita hotu doben sira.
Saudasoens loron domin
Saudasoens hakerek ba ita hotu.
Ksolok loron domin ba ita hotu carros amigos
