Introdusaun
Timor-Leste hanesan Nasaun ida ne’ebé maka hetan Independensia iha loron 28 Fulan Novembru Tinan 1975, no hetan Restaurasaun da Independensia iha loron 20 Fulan Maio Tinan 2002, hafoin Restaurasaun da Independensia, tanba Timor-Leste hanesan Nasaun ne’ebé lozakaliza iha Sudeste Aziatiku no mos hanesan Nasaun frajil hela.
Tamba sei Frajilidade iha konstrusaun Estado de Direitu no falta Recursos Humanos. Maski iha frajilidade maibe sei iha prosesu dezemvolvimentu no promove kapasidade rekursus humanus nian liu husi formasaun oi-oin. Ho nune’e maka bele halo situasaun polítika Timor-Leste nian bele muda drastikamente husi tempu ida ba tempu seluk.
Ho ida ne’e Estadu tenke kuidadu tebes atu oinsá maka proteje nian meiu-ambiente rasik, ne’e ita bele hare’e iha Konstituisaun Repúblika Demokrátika Timor-Leste.
Koalia kona ba objetivo Estado nian ne’ebé regula iha artigo 6.o alenea (f) hateten katak Proteje didi’ak meiu-ambiente no boli nafatin riku-soin rai nian, ho ida Ne’e meiu-ambiente hanesan lembranca ida hosi Maromak ne’e folin boot liu, ho ida ne’e ita ema tengki tau matan, kuidadu no promove ho diak tamba ne’e riku soin rai nian ne’ebé fo moris ba ita ema no ambiente ema moris nian, tamba ita ema ho meiu-ambiente ne’e rasik iha relasaun tamba ita ema mos parte ida hosi ita nia ambiente ne’e rasik.
Tamba ita ema iha empluensa boot ba ambiente ne’e rasik, hanesan ita hatene kona ba eksploitasi no eksplorasi ema ho natureza liu hosi sensia no teknologia, talves ita rona kona ba hahalok ema ne’ebé estraga ita nia ambiente ne’e rasik tamba ita la hatene benefisiu hosi meiu-ambiente no riku soin iha natureza nia ne’e ita la uza ho efektivo no efesien, tamba menus konsensia ita ema kona ba lalaok ambiente ne’e rasik.
Formulasaun Problema
Oinsa Estado foti desizaun Kontra hasoru ema ne’ebé estraga meiu-ambiente no halao peska illegál iha Timor-Leste?
Materia Legál
Konstituisaun RDTL
Kodigu Penal Timor-Leste
Dekretu Lei No 26/2012
Dekretu Lei No 5/2011
Dekretu Lei No 36/2012
Baze Legál
Baze legál ba artikel ne’e maka Ánalizasaun Jurídiku Krime Hasoru Ambiente no Peska Ilegál iha Nasaun Timor-Leste, mak hanesan regula ona iha ita nia lei inan Konstituisaun Republika Demokratika Timor-Leste iha Artigu 6.o hatuur Objetivu ida, hosi objetivu fundamental Estadu nian sira seluk, maka proteje ambiente no prezerva rekursu naturais. Artigo 61.o repete objetivu ida-ne’ebá no dehan espesífiku liu katak estadu tenke promove asaun defeza no salvaguarda ambiente. Iha sorin ida, rekonese sidadaun sira hotu nia direitu ba moris saudável no ambiente ne’ebé matak, iha sorin seluk ema hotu iha devér atu prezerva no fó kuidadu ambiente ba jerasaun foun.
Nune’e mós, artigu 139.o destaka kona-ba iha nesesidade atu aproveita rekursu naturais ne’ebé seihalo hodi mantein ambiente matak no evita estraga ekosistema.
Regula mos iha dicretu lei No.19/2009, de 8 de Abril aprova o codigo Penal Timor Leste, Iha artigu 215.o Krime hasoru ambiente, artigu 217.o krime hasoru flora no fauna, artigu 219.o peska illegal, no artigu 220.o meiu ba peska ilisitu.
Hare mos iha dicreto lei No.26/2012 (Lei Baze Ambiente), iha artigu 1.o definisaun ambiente katak : hala’ok hirak ne’ebé atu hamutuk hanesan sistema fiziku, kimiku, biolójiku no ninia relasaun ho fatór ekonómiku, social no kultural, ne’ebé hetan inpaktu kedas ka lae, mediatu ka la mediatu kona-ba ai-horis no ema nia kualidade moris.
Artigu 4.o objetivu, alenia (d), haburas matenek no fó hanoin ba populasaun atu komprende kona-ba biodiversidade nia importánsia no valor hosi komponente ambientál sira no nesesidade sá hodi uza nafatin nia.
Artigu 6.o Direitu sidadaun, artigu 7.o sidadaun sira nia devér, artigu 14.o Padraun ambientál, artigu 16.o Monitorizasaun ambientál, artigu 20.o Agrikultura, floresta no peska, artigu 25.o Tasi ninin alenea 3. Bandu atu uza buat hirak ne’ebé bele rabenta, venenu ka kualkér sustánsia tóxika seluseluk atu halo esplorasaun ba ekosistema no espésies tasi nian.
Faktus No Kronologia
Deste Timor-Leste hetan Restaurasaun da Independensia iha loron 20 Fulan Maio Tinan 2002, kazu kona krime hasoru ambiente barak mak akontese iha territorial laran hanesan ema sunu rai, tesi ai, fokit, rekolle ka halo tráfiku ilegál hasoru flora no fauna nomos halao peska ilegál iha água marítima nasional.
Iha Faktus ne’e, defaktu hatudu duni katak durante ne’e kazu krime hasoru ambiente barak maka akontese, mesmu iha rai maran no iha água marítima.
Analizasaun Legál
Hare ba iha antesedensia, faktus no kronologia ne’ebé kabe ba baze legal artikel ida ne’e maka hanesan tuir mai ne’e ; desizaun Estado ba halolao ambiente ema moris nian tuir konstitusaun RDTL katak recursus naturais iha Nasaun Republika Demokratika Timor-Leste persija regulamentu ida iha area direitu nian hanesan mos hatur ona iha ita nia lei inan rasik. Regulamentu ne’ebé iha relasaun ho meiu-ambiente nian atu halolao meiu-ambiente ida ne’e mos parte ida hosi objetivu estado nian ne’ebe kestia ona iha artigu 6.o alenia (f) konstitusaun RDTL, ne’ebé dehan katak objetivu nasaun atu fo protesaun ba ambiente no mos rekursu naturais nian mak hanesan rikusoin sira iha rai leten, rai okos, be no raimaran ne’e Estado tenki tau matan didiak tamba sira ne’e hodi halo lao ekonomia rai laran nian hanesan iha Oecusse, Tutuala, Jaco no Atauro.
Ambiente ema moris nian no rekursu naturais iha relasaun ho ita nia povo Timor-Leste no persija kontribuisaun hosi Estado.
Hanesan ita hatene katak iha ita nia kostitusaun RDTL artigu 61.o dehan katak : ema hotu-hotu iha direitu atu moris iha ambiente ema moris nian ne’ebé moos, no habelun di’ak ho natureza no iha obrigasaun atu proteze no halo diak ba zerasaun loron ikus nian, Estado rekoñese katak iha nesesidade atu tau matan didi’ak no fó valor ba ita nia rain nia riku-soin, Estado tenki fo sai buat ne’ebé mak sei halo atu depende natureza maibé sei hodi halao mos nia ekonomia.
(Todos tem direito a um ambiente de vida humano, sadio e ecologicamente equilibrado e o de o proteger e melhorar em prol das gerações vindouras. O Estado reconhece a necessidade de preserver e valorizar os recursos naturais. O Estado deve promover acções de defesa do meio ambiente e salvaguardar o desenvolvimento sustentável da economia).
Atu halolao no venefisio rekursu naturai hanesan hatur ona iha ita nia lei inan konstitusaun RDTL katak : Rekursu naturais sira ne’e Estado maka tau matan no utiliza ba zerasaun-zerasaun sira iha futuru mai no ne’e objetivu Estado nian tenki tau matan no proteze meu-ambiente no depende ba dezemvolvimentu ne’ebe iha Nasaun Timor-Leste, tuir regulamentu ne’ebé determina hosi estado, atu regula no habelar desizaun ba hodi halo lao meu-ambiente, regulamentu, dezemvolvimentu halolao ambiente e fo benifisu ba ita nia rekursu naturais, hodi regula hosi hahalok kontra lei ne’ebé iha relasaun kona ba lei ho ema seluk ou objetu direitu sira seluk, ho hahalok direitu ba rekursu naturais, atu dada hikas aktividades ne’ebé iha inpaktu sosiais atu haklaken aktividades sosializasaun ambiente tuir regulamentu ou lei ne’ebé ejiste iha Nasaun Timor-Leste.
Atu halolao ambiente, Estado mos iha kompetensia atu halao, deside no habelar atu bele hasae konsensia no responsabilidade atu deside atu foti desizaun atu halolao ambiente, hasae konsensi no direitu atu resposabilidade ba sosiedade iha area ambiente nian, no habelar, hasae koñesementu servisu hamutuk ho sosiedade, iha mundu kona ba kampu de travallo no Estado iha maneira halolao kona ba ambente, benifisiu no ba teknologia ne’ebé modernu iha area ambiente nian, e kona ba informasaun ambiente ema moris nian ne’ebé habelar ba ita nia sosiedade no Estado fo kondekorasaun ba ema ou instituisaun ne’ebé iha esforsuan (Berjasa) iha area meiu-ambiente nian.
Iha konstituisaun RDTL artigu 139.o kona ba rekursu rai leten nian, rai okos nian, be territorial, plataforma continental no zona ekonomico, eskluzivo, ne’ebé infortante ba ekonomia, ne’e Estado nia propriedade ne’ebé tenki utiliza iha forma lolos no hanesan deit ba ema hotu-hotu, tuir interese nasional. Ne’ebé temi iha artigu 1.o iha leten tenki halao preparasaun ba finanseiru ne’ebé tenki tuir lei, maibe venifisiu hosi rekursu naturais ne’e tenki tuir ekologi no hasesan hosi estragos ekosistema-ekosistema sira seluk.
OPINIAUN LEGÁL
Timor-Leste hanesan Nasaun ida ne’ebé maka hetan Restaurasaun da Independensia iha loron 20 fulan Maio tinan 2002, hafoin Restaurasaun da Independensia iha prosesu hari’i Estado de Direito Democrático, kuidadu tebes atu oinsá maka proteje nian meiu-ambiente rasik, tanba ne’e Estadu iha devér atu konserva no fó kuidadu ba ambiente.
Iha Governu konstitusionál IV, rekonhese katak importante tebes hamosu sistema jurídiku ambiente nian ida ne’ebé bele hatuur prinsípiu no regra hodi konserva no fó-kuidadu ba ambiente nomoós proteje direitu fundamentál sidadaun Timór sira nian atu bele haburas rekursu naturais no halo jestaun di’ak ba ambiente tuir prespetiva globál no integradu. Tamba agora iha ekonomia merkadu ne’ebé nakloke daudauk, ambiente no rekursu naturais maka nu’udar bee-matan inportante ba rikusoin no fó tulun atu haburas ekonomia no hamoris komunidade, maske nune’e. Buat rua persiza jestaun hanesan no sustentável ne’ebé bele fó moris di’ak liu ba sidadaun sira iha kuadru dezenvolvimentu sustentável.
Direitu ba ambiente mos no saudável nu’udár direitu umanu ne’ebé hetan rekñesimentu iha mundu no, iha tema Analizasaun Jurídiku Krime Hasoru Ambiente no Peskas Ilegal ida ne’e hakerek nain hare ba iha parte Jurídiku iha ita nia Konstituisaun Repúblika Demokrátika Timor-Leste ne’ebé konsidera protesaun ambientál ba hanoin rua, ida mak konsidera protesaun nu’udár hala’ok fundamentál Estadu nian no ida seluk nu’udár direitu fundamentál sidadaun Timór oan sira hotu.
Konstituisaun Repúblika Demokrátika Timor-Leste hatuur ona objetivu fundamentál Estadu nian iha artigu 6.o Objectivu Estadu nian alenea (f) Proteje didi’ak meiu-ambiente no boli nafatin riku-soin rai nian. Maka proteje ambiente no prezerva rekursus naturais. Artigu 61.o (Meiu-ambiente)
Ema hotu-hotu iha direitu atu moris iha ambiente ema moris nian ne’ebé moos, nabelun-di’ak hó natureza, no iha obrigasaun atu proteje no halo di’ak ba jerasaun loron ikus nian.
Estadu rekoñese katak iha nesesidade atu tau matan didi’ak no fó valór ba ita-nia rain nia riku-soin.
Estadu tenki fó-sai buat ne’ebé mak sei halo atu defende natureza maibé sei hodi hala’o mós nia ekonomia.
Nune’e mós destaka kona-ba iha nesesidade atu aproveita rekursu naturais ne’ebé sei halo hodi mantein ambiente matak no evita estraga ekosistema, iha artigu 139.o (Rekursu naturál sira)
Rekursu rai leten nian, rai okos nian, bee territoriál, plataforma kontinentál no zona ekonómiku eskluzivu, ne’ebé importante ba ekonomia, ne’e Estadu nia propriedade ne’ebé tenke utiliza iha forma loloos no hanesan de’it ba ema hotu-hotu, tuir interese nasionál.
Kondisaun atu aproveita rekursu naturál sira-ne’ebé ko’alia iha númeru uluk tenke sai nu’udar rezerva finanseira obrigatóriu, tuir lei.
Aproveitamentu rekursu naturál sira tenke haree didi’ak mós ba ekilíbriu ekolójiku no sees husi destruisaun ba ekosistema sira.
Nune’e mos regula iha kodigo Penal Timor-Leste, Iha artigu 215.o Krime hasoru ambiente ; Ema ne’ebé hasoru dispozisaun legál ka regulamentár ne’ebé proteje ambiente, provoka ka halo, direta ka indiretamente, emisaun eskoamentu, radiasaun, extrasaun ka eskavasaun, aterramentu, ruidu vibrasaun, injensaun ka depózitu iha atmosfera, iha solu, subsolu ka água terrestre, maritime ka subterranean, inkluindu iha zona fronteirisa, ka kaptasaun ba be, ne’ebé bele prejudika gravemente sistema natural nian ekilíbriu, sei hetan pena prizaun too tinan 3 ka multa.
Kuandu ajente dolozamente liberta, emite ka introdúz radiasaun ionizada ka substánsia seluk iha ar, rai ka be maritime, continental, superfisial ka subterranean, ho kuantidade ne’ebé halo ema ida kaliu-tán hetan ofensa corporal grave ne’ebé ezije tratamentu médiku ka sirúrjiku ka hamosu sekuela irreversivel, sei hetan pena prizaun tinan 2 to tinan 8, no, halo ema ruma mate karik, sei hetan pena prizaun tinan 5 too 15.
Artigu 217.o krime hasoru flora no fauna, iha artigu ne’e dehan katak ; Ema ne’ebé, ho grave prejuiza ba ambiente, tesi, sunu, fokit, rekolle ka halo tráfiku illegál ho flora nia espésie ne’ebé hetan klasifikasaun hanesan ameasada ka ho perigu atu hotu, ka espésie ne’e nian semente, tanba destrui ka altera gravemente nia habitat natural, sei hetan pena prizaun too tinan 3 ka multa. Sei aplika mós pena previstu iha númeru anterior ba ema ne’ebé introdúz ka fasilita entrada ba espésie ne’ebé la’ós autóktene no, nune’e, prejudika ekilíbriu, hasoru lei ka dispozisaun ho karakter jerál atu proteje fauna ka flora nia espésie.
Artigu 219.o peska ilegal maka hanesan ; Ema ne’ebé pratika peska iha água maritime nasionál maski laiha autoridade administrativa kompetente nia lisensa ba peska, sei hetan pena prizaun tinan 3 ka multa.
Kuandu ajente pesoa koletiva ida, sei lori responbilidade criminal, nu’udar númeru anterior, ema ne’ebé, tuir lei, reprezenta pesoa koletiva reprezentante legál, no mós, iha sosiedade ho konstituisaun irregular, sósiu ka membru sira-ne’ebé autoriza aksaun sira-ne’ebá, peska ba subsisténsia doméstika la hetan pena nu’udar númeru 1.
Artigu 220.o meiu ba peska ilisitu, maka hanesan ; Ema ne’ebé uza arma de fogu, explozivu, substánsia tóksika ka instrument seluk ka arte similar ho efikásia destrutiva ba fauna maritime hodi halo kaptura ba rekursu pixíkola iha água nasionál terrestre ka maritime sei hetan pena prizaun too tinan 5 ka multa.
KONKLUZAUN
Atu konklui katak, opiniaun legal hosi artikel ne’e sai hanesan faktores inportante, tanba ema hotu-hotu iha direitu atu moris iha ambiente ema moris nian ne’ebé moos, nabelun-di’ak hó natureza, no iha obrigasaun atu proteje no halo lao ita nia ambiente.
Timor-Leste ratifika ona konvensaun internasional kona ba mudansa klimátika, konvensaun internasional diversidade biolójiku, konvensaun viena, ho ida ne’e Estadu rekoñese responsabilidade tanba ne’e aprovasaun lei baze ambiente, tanba ida ne’e Konstituisaun Repúblika Demokrátika Timor-Leste, konsidera protesaun ambientál nu’udár hahalok fundamental Estadu nian.
Liu hosi entesedensia, faktus no kronologia relata iha leten, konkluzaun iha momentu ida ne’ebé sai preukupasaun iha sosiedade Timor-Leste, katak ema ne’ebé halo krime hasoru ambiente, tesi ai, sunu, krime hasoru flora no fauna halao peska Ilegál sira sei hetan kastigo tuir kodigu penal Timor-Leste.
REKOMENDASAUN
Bazea analizasaun legal ne’ebé mensionadu nune’e eskritór hakarak hato’o rekomendasaun ba ; Sekretaria Estadu Meu-ambiente tenke halo sosializasaun ba iha eskola sekundaria, nivel universidade no sosiedade sivil sira kona ba dikreitu lei N.o26/2012, Lei Baze Ambiente, dikreitulei N.o 5/2011, Lisensiamentu Ambiental, dikretu lei N.o 36/2012, Sirkulasaun Polusaun.
Hodi habelar informasaun ba iha komunidade iha area remotas sira atu hatene nune’e sira labeleh estraga ambiente, tanba sira hatene ona katak semak halo krime hasoru ambiente ka peska ilegal ka ne’e sei hetan pena kastigu.
Sira mos bele hatene no sai exemplar ba jerasaun tuir mai bele banati no kumpri prosedimentu legais iha Timor-Leste.
Obrigado e Bem Hajam
Eskritór
Januario R. da Silva.
Alumni Mestradu Siensia de Direitu Universidade da Paz.
